|
Vo Glaihyynige bis in Hirzbrunne
Isch ebbis los, das isch nid gspunne
Mir hänn e Haafe mit zwai Beggi
Und Türm so hoch wie d Wolggedeggi
Im Summer kasch uff unserer Syte
Ganz gmietlig in de Wälle rytte
Vom Tinguely bis an d Kasärne
Sehsch Schwimmfisch deert dr Rhy ab schwärme
Oder dr Tierpark Langi Erle
Isch au e sone schmucki Perle
Sogar dr grossi Eff Cee Bee
Hesch friener im Landhof schutte gseh
Doch nai, nid nur im aigene Land
S Glaibasel, das isch wältbekannt
Dur s Tattoo oder au d Mässe
Wirds mindere Basel nid vergässe
Au d Baize um dr Schieffi Egge
Mien sich uff gar kai Fall verstegge
Denn hänn mir no, Diriff Diff Diff
Dr Leu, Wildmaa und Vogel Gryff
Nur d Frau Fasnacht loht ys lyyde
Si duet s Glaibasel gar gärn myyde
Dr Lällekeenig hebt se zrugg
Grad kurz vor dr mittlere Brugg
Und duet eso, das duet ys steere
Wie si em Grossbasel wurd gheere
Ganz schelmisch luegt är, s isch zem gruuse
Und streggt ys no dr Lälli uuse
Doch jetz hänn mir dä Keenig gstohle
Wänn so d Frau Fasnacht zue n’ys hole
Mer jaage ihn und au si Ranze
Dien d 3E uff sym Kopf loh danze
Als Glaibasler Kämpfer dien mir laufe
De Grossbasler dr Schnyyd abkaufe
Yber d Räbgass gohts, ratzfatz
Zem Klybi, denn an Wettstaiplatz
Dur d Rhygass gohts denn, ohni z zugge
Im Schoofegg, Adler ain go schlugge
Denn yber d Brugg uff schnälle Sohle
Im Grossbasel go Aalauf hole
Bym Schottekäller, zrugg go schränze
Dien mir mit unserer Power glänze
Und kämpfe so, us guetem Grund
As d Fasnacht wider zue n’ys kunnt
|
